無端端又去多次日本

幾個星期前收到達美航空公司 (Delta Air Lines) 的信，通知我同爹媽的飛行里數年底到期。哈，我地成十幾年冇搭過呢間航空公司，仲以為D里數一早已經報銷晒啦，加上間公司已不再飛來香港，就算D分未過期都冇機會用啦！

Delta 十幾年前有辦香港至洛杉機直航，我地當年都坐過好幾次，貪佢價錢平，服務亦比其他美加航空公司好（當中又以 United 同 Air Canada 最惡名昭著），所以計埋每人都有好幾萬分。如果就咁由得D分 Expire 真係好唔抵，就算香港用唔著，用來換機票送給我住在加拿大的兩位哥哥都好，於是上佢地網站睇睇，發覺原來 Delta 仲有個 GSA 在香港，就打上去問一問。那位小姐都幾 Helpful，佢話雖然 Delta 冇再飛香港，但仍然可以用積分換佢地 SkyTeam 聯盟航空公司（包括西北，大陸，大韓，法航等）的機票。我本來已有計劃明年春天去加拿大，聯同哥哥們幫媽媽搞大壽，順便趁自己要被迫重考之前換領新 Driving Licence，不如試試換兩張香港加拿大機票啦！好可惜，免費機票本來已經唔係咁容易換到，加上仲要託一間航空公司去攞另一間航空公司的機位... 結果是，在我媽媽生日之前都沒有位，看來還得掏腰包另外買機票去加拿大了。

但那些里數怎麼辦呢？本來付錢是可以 Extend 個 Expiry Date，但這間航空公司 Redemption 咁麻煩，又難攞位，冇理由仲俾錢佢，都係有得換快D換左佢算數啦。靈機一觸，不如就試下換唔換到四張日本機票，同老爹老媽一齊去旅行啦！自從畢業之後，除左隅然幾次陪過佢地返大陸或去澳門之外，真係好耐好耐未同過佢地一齊去旅行了。一來自己工作的頭十數年真的很忙，連自己放假去旅行的機會也不多；二來佢地年紀漸老亦慢慢失去去旅行的興趣，閒來寧願看看電視，打下麻雀，或者去下各地的賭場（兩老近年迷上角子老虎機！）。以往我曾提出過一起去旅行都被一句“徙錢”或者“你搵女友陪你啦”就輕輕婉拒了。今次如果有免費機票佢地就不能再拒絕啦！

果然給我訂到明年九月份的東京機票 (Northwest Airlines)，去五日，真係要好好想想同爹媽去邊度玩！記得我成世人第一次日本自遊行，就係同爹媽去的，當年我仲讀緊大學，放暑假自己飛左去美加玩左個幾月（在哥哥和同學家黐飲黐食），返香港時約定爹媽在日本 Meet，在日本台灣玩左差不多兩星期，現在諗番都好回味！當年我盲鍾鍾乜都唔識，又沒有 Internet 找資料，揸住本旅遊書買左個 JR Pass 就帶住兩老 （當年都未算老）去仙台，松島，青森，函館，札幌等，因為安排不周（或者正確D講係沒有安排過），那次旅程都算頗失敗，又累，又沒有讓團員（爹媽）好好享受過。如今我話晒都學會了一點點日語，又有了數次日本自遊行的經驗，加上網上有大量資料和心得分享，今次不容歷史重演了，一定要讓兩老有個愉快的旅程！

初步構想係同佢地去箱根玩兩天，舒舒服服浸下溫泉，餘下時間在東京行下食下咁啦...

還有一年時間，大概不用現在就開始考慮吧！ :)