也談談網絡欺凌

近日網上比較熱門的話題，不了解事件來龍去脈（而又八卦）者可看此。

我不想評論這件事誰是誰非，每個人都有不同的觀點、角度、立場。

我想凡事有果必有因，而這次事件的導火線，是有人以正義之士姿態出現，以自己的道德標準將另一群人標籤為邪魔敗類。結果或許也在她本人意料之外，因那群"妖魔"之首領竟然就此消失了，一眾"小魔"頓失所依，遂以各種手段對該正義人士發起攻擊...

這是"恐怖襲擊"還是"聖戰"？恐怕同現實中的"反恐戰爭"一樣，誰對誰錯永遠好難有公論。

至於雙方"攻擊"所用的手段，其實亦沒有光明正大和卑鄙無恥之分：你有巡航、我用民航；你以筆伐、我取網攻。結果都是兩敗俱傷。

歸根究底，是社會上的包容太少、對立太多了。如果任何一方有意無意或有心無意下"擦鎗走火"，損害了對方，就很容易引起衝突。

反正你永遠不能說服我，我也永遠不能改變你。與其互相批評指責攻擊，不如大家嘗試從對方的立場去想想，接受對方存在的現實/權利吧。

當然，我地做每件事之前都要諗清楚後果。"先撩者賤"的道理，唔駛多講啦！

九龍皇帝駕崩了...

剛剛至從明報即時新聞網得知，原來九龍皇帝上個禮拜已經駕崩，享年八十有六。

其實我對呢位“中國最後一位皇帝”唔算特別有感覺，但知道他的離開畢竟有Ｄ失落。一諗起佢，就冇辦法唔聯想起佢好有香港特色的墨寶，果班侵佔大皇知識產權、利用佢獨特創作風格來圖個人私利的無恥（所謂）藝術家，同埋在佢果堆令人不太明白的“皇榜”中隱約提起的港英政府（文中周時會提起英國人霸佔左佢九龍國土）。又一個經典的集體回憶被無情的時代巨輪抹去了，傷感就稱唔上，但真係有Ｄ稀噓......

另一個多年前印象中的人物今日又上左頭版... 小學時代的一位師兄，其弟是我同班同學，被控行賄的那位上市公司主席，今日棄保潛逃了。他的樣貌我仍然依稀記得，同報紙上的近照基本分別唔大。雖然我同佢同埋佢細佬都有二十幾年冇聯絡了，但我諗如果在街上撞到都仲會有似曾相識果種啦。

先係多年老友，之後又整多件小學同學... 慨嘆點解人地發達偏偏冇我份之餘，有時都唔知係唔係應該慶幸自己係普通冇錢人，少好多犯罪的誘惑，亦少左好多煩惱...

吓？乜話？喂！係唔係自我安慰下都唔得先？

相對充實的一天

對於我呢個無聊人來講，琴日已經算係難得的充實。

趁著書展的最後一日，橫掂冇野好做，就去趁下熱鬧。其實本身我個人無文化可言，平時甚少睇書，加上書展又唔係有乜咁特別，Ｄ書都唔係認真平（大書店只有八折，唔係買得多根本唔值得去同人迫）。不過為免自己在家發霉，都係去下啦，唔係就會同時代同社會更加脫節。

其實我都要買Ｄ日文能力試的參考書。前幾日日文班考畢業試之時至從同學口中得知，原來要申請持續進修基金資助，單係Pass校內考試係唔足夠的，仲一定要考埋公開試合格先算。但上左成年堂都冇收過校方的有關資料，好似有少少被搵笨。不過都唔緊要，而家報仲來得切考今年十二月（一年一度）的試。由於一個公開試只可以Claim一個Course錢，而我明年又想繼續讀，但距離基金兩年內要Claim晒之規定限期內就得番一次公開試機會，所以為左幾千蚊（鬼叫我又窮又Cheap），唯有搏一舖一次考兩個Level。即係話如果我想成功Claim番多少，就要俾心機自修多一年有多的課程，咁的確有需要趁減價買定Ｄ"天書"谷谷佢，雖然，到頭來我有冇心機同毅力的起心肝認真去讀係另外一個問題。不過唔買就實肥，都係買定唔好俾自己咁多籍口啦。

書展果然超多人，打蛇餅行左成大半個鐘至入到場。香港人真係鍾意排隊！老實講，我唔係咁無聊真係有錢派都唔好預我（睇下幾多啦 :p），俾錢人仲好似搞到要哀求佢先肯做我生意咁。不過唔係做到咁（好似好IN又好似有寶咁）又唔會咁多人來。唉！反正我向來都唔了解群眾啦，都唔駛大驚小怪。

買左幾本日文書，又訂左本旅遊雜誌（相多過字果種，至O岩我呢種盲字唔識多隻、鍾意旅行又唔慌影到Ｄ咁靚相的人；當然最主要原因係佢夠多野送，O岩晒我咁Cheap又貪小便宜啦），都差唔多啦。包包好重，一陣仲要去睇波呀，都係收工啦。

三隊英超勁旅首度來港，對於我一個咁鍾意睇波的麻甩佬本應係大件事。不過其實我只係鍾情心愛的阿仙奴一隊，基乎對老婆都未有咁專一呀(:p)，所以呢幾隊都唔多吸引我，利物浦仲有Ｄ唔Like添！更枉論要一早去大球場排隊撲飛，唔通真係越難買就越有寶咩，鍾唔鍾意都好，死都要撲張飛番來先至夠High冇蝕底咩？（拿，又係度踩香港人喇！）不過我老婆同事有飛，就免為其難去迫埋一份趁下墟咯！



今次係我第二次現場睇"英超"，上次係年半前去英國高貝利球場睇阿仙奴對曼城，咁當然同今次係好大好大分別啦！上次山長水遠又洗咁多銀兩，加上好難得買到出晒名極難買的心愛阿仙奴波飛（真係要再多謝香港阿仙奴球迷會），又係我最最最鍾意的球隊。今次呢Ｄ友誼波係不可同日而語，但總算在香港同三萬幾四萬人一齊睇波，都係一個好難得的體驗。

果然如我所料，今次戲碼以足球的角度來講真係認真麻麻，甚至連本地波都不如。球賽如果冇競爭性、球員冇爭勝心，就話知你係巴塞定皇馬都唔會好睇（我又唔係貪佢地靚仔！）。頭場果兩隊（Fulham vs Portsmouth）真係睇到我有少少火滾，成場波慘過練波，雙方又唔願爭又唔願跑，打左20分鐘左右仲齊齊走去飲水停左成5分鐘！我知香港係好熱，但係你地係職業足球員，個個起碼幾十萬港紙週薪，唔該可以專業少少都得瓜？球証又唔話佢地！結果個波交來交去咁，毫無精彩更無刺激打完上半場，打得稍稍積極的富咸反而被全場不知所謂的老樸唯一攻門就領先。半場班大帝留戀冷氣更衣室，居然本來15分鐘休息要等左30分鐘至施施然行番出來踢埋果45分鐘全無比賽意識的比賽... 如果我在屋企睇直播的話，實行晨早轉左台去打番兩舖Winning或者Wii先啦！

尾場係全場大部份人期待的南華對利記，兩隊我都麻麻。我以前睇本地波（80年代）係捧精工的，南華係死對頭；利記又係阿仙奴對頭，加上佢地Ｄ波不嬲都係悶（高Ｑ大棍＋守多於攻），所以我就冇乜期望。不過睇完頭場悶過去修頓睇阿伯們鬥波之後，都期望南華作為本地班挑戰世界級球隊會打得積極拼搏Ｄ。同埋我都暗地裡希（奢）望南華作為"香港阿仙奴"（佢地件紅衫白袖戰衣本來就係學阿仙奴的）可以一舉打敗利物浦，一挫佢地來季在英超的氣勢！

點知主辦當局居然要南華主場身份讓左著紅色主場球衣的權利俾利物浦，改著白衫藍褲，當堂冇晒阿仙奴的霸氣（嘻嘻，本來就算著阿仙奴的衫都冇霸氣啦！）。不過南華班教職員都係抵讚的，居然強敵當前，都冇用香港足球近年每戰外隊必用的"（唔）穏守（冇）特擊"戰略，全場緊迫對手，我諗利物浦都被佢地的拼搏進取打法嚇一跳！事實上，上半場除左個罰球同十二碼（兩球皆致命）之外，我都睇唔到利記有乜大優勢，反而南華有幾次進攻幾精彩！但畢竟班數唔同，加上可能緊張，有一兩次靚埋門都浪費左，好在大哥李海強一記40碼世界波罰球收左利記後備門將Scott Carson，令本地／南華Fans都非常興奮！

可惜，精彩賽事只維持左45分鐘，滿以為南華大好形勢（誇張左Ｄ）下半場可以迫利物浦打出身價。但係事與願違，經過上半場的搏晒老命，南華的本地球員體能缺陷下半場表露無遺，再唔能夠緊迫對手，前鋒無力再製造威脅之餘，後防更俾人地一放就過。好彩最後只係輸多一球，總算為香港足球保留了一點面子啦！

禮拜五係決賽，今次我冇飛但都會在屋企睇直播，相信到時南華對富咸會著番主場紅衫白袖戰衣，到時就等我做番一次"擁南躉"，支持下呢隊老翻阿仙奴啦！

稀客

日日無所事是，都係上下網睇下呢睇下路，上下討論區、又或者去人地的Blog度做下CD-ROM。都有諗過自己寫Ｄ野渡下日神，但係一來又懶，二來又唔知寫乜好，三來係唔知寫來做乜，所以一直都係得個睇字。米以為我係果Ｄ好Out的網盲接受唔到網上社交呀，實情我係箇中老手兼高手，十年有多之前當年青人仲係沉迷機舖同玩Line之時，我已經上ICQ溝女無數啦，仲俾我認識左今日的老婆大人添！邊個敢話網上無真愛呀？

可能因為以前做得呢Ｄ野多，而家已經冇乜衝勁在網上結交新朋友。一來係唔似得以前咁饑渴，二來係人老左就變得自閉。後生時一有心事就想搵地方抒發：搵人傾計啦、聽或唱下Ｄ歌詞好似差唔多Feel的歌啦、借下酒（或其他野）消愁啦！而家覺得呢一切都實在係好無聊：自己的問題與人無關，即使人地肯聽亦只有愛莫能助；自我發泄消愁呢家野就更加幼稚，問題解決唔到之餘仲只會帶來更多煩惱（例如飲醉之後所有可能發生的後果）。我同好多差唔多年紀的男性朋友傾開，大家都好有同感，因此大家就漸漸變得沉默、內籨、含蓄，老友見面亦變成心靈交流多於高談闊論。當然，女性的思想構造係好唔同的，我亦有幸有好幾位多年紅顏知己（即係人地的靚老婆／靚媽咪），不過男人之苦，既不想亦不容易同佢地啟齒，講左亦都多數唔會聽得明（唔係話佢地蠢，只係女性好多時唔明男人的價值觀，男人亦好難了解女性果套思考邏輯）。老朋友如是，新朋友就更加提不起勁去搵啦！結論係，所有心事都係藏於心底，讓它歷久常新罷了。

上個禮拜無啦啦手痕，竟然開左呢個Blog，仲不經不覺已經寫左一個星期。的確，心裡面的說話寫左出黎係好似暢快左Ｄ既，雖然我唔排除呢種感覺只係因為花左成個鐘係度打字之後的麻木效應。不過由開始到而家，我都只係諗住當寫下日記同Kill下Time咁啦，想發牢騷就發、想鬧下人就鬧、踩下人就踩，完全唔駛負責任果隻。所以連我老婆都唔知我開左呢個竇架！

今日又係在網上閒逛，偶然睇到兩位朋友的Blog想回應下，估唔到佢兩位都真係會過來我呢邊睇下我係乜水喎。寫左Ｄ野有人俾面肯睇始終係令人感動的，我衷心多謝佢地，亦希望佢地有空仍會過來探下我呢個無聊人啦！

日文考試

由於日子無聊，加上政府又有持續進修基金，諗住唔好徙左，於是上年報讀了日語入門班。其實都唔錯既，一來日文都算係比較有用的外語，主要係大部份日本人Ｄ 英文“唔講都唔知、講左都唔覺”係英文，如果去日本玩，或者工作上或社交上遇上日本人，識得少少佢地的語言就非常有用；而且日本文化都有好多有趣同值得我 地學習的東東，大眾化Ｄ有漫畫或者日劇，有深度Ｄ就可以了解下佢地Ｄ民風同民族性，包括有禮貌同公德、尊敬長輩、尊重文化歷史（侵華時期除外）、團結、忠 心、創意、毅力、鬥心、自強（、變態）等等...

只不過，當興趣學下、打發下時間又充實下自己就好喇，但係一到要考試就真係大鑊。幾十歲人，都數唔到幾耐冇讀書考試咯！現實生活中好多野係靠執生， Hard Facts呢Ｄ野好多時可以隨時上網或找參考書，或者打個電話就可以搵到。但讀書就唔同啦，冇得Open Book，全部要記晒落RAM度，尤其是果Ｄ我唔識佢佢又唔識我的生字Vocab，好似個個都差唔多（老實講，真係來來去去果廿幾三十個音的不同組合－－ 因為日語的五十音當中使用率好唔平均，有Ｄ成日出現，有Ｄ學左成年都未見過咁滯）都唔知點記。最慘係自己個Config係維持在十幾二十年前的科技，頂晒 龍得640k RAM，果個年代又冇Flash Memory Card，點記得咁多呢？加上慣於唔到Last Minute迫唔出“真功夫”，所以推下推下到昨晚考試前夕先來衝刺，通完宵溫溫炖炖都唔知記得幾多...

不過呢Ｄ考試又唔係咩會考高考會決定人的一生，學生為興趣學校就求財，都唔會搞到好難合格嚇怕晒Ｄ客仔，事先老師己經放左水會考乜，所以今朝胡胡塗塗都應 該答到合格需要的分數掛。咁下年仲讀唔讀？梗係讀啦！如果唔Keep住肯定𣊬間就唔記得晒，咁就白費左我成年以來每個禮拜六咁早起身去上堂，同埋琴晚通 宵的努力啦！

我真係老了，所以我更愛Keroro

今日終於去睇左期待已久的Keroro軍曹大電影2之決戰水著兵團，全香港只得又一城一間戲院放映日文版，遠D都要去睇啦！雖然TVB的配音已經比不知所 謂的有線好得多，但係同原裝日文版果班Pro到不得了的日本聲優比，真係差天共地。尤其係配Giroro同Tamama果兩位聲優，直頭係上晒身咁，其他 如Keroro、Dororo、Kururu、摩亞、夏美、桃華甚至連旁白果個都實在係入型入格，無械可擊，令人感動流涕！

好多人聽到 Keroro軍曹，尤其從一個三十幾勾的男人口中講到咁正，都會表現出好不屑的表情，從佢地眼光已經知道佢地斷定我這個人無比幼稚、無聊、低 能、白痴、膚淺、變態、Bad Taste... 我唔會怪佢地，因為或者我的確如此（當全世界認為你是這樣，你很可能的確是這樣－－即使你打死都唔同意，都係無補於事），更可能係佢地根本從來未睇過呢套 漫畫／卡通。

其實，呢套作品本來就係應該最適合我這種三十幾歲的人睇的。Keroro軍曹在日本最出名的地方，係佢對好多套日本經典動畫 作品的模仿同影射，Keroro小隊本身已經係學足超級戰隊系列，加上包括叮噹的一係列藤子F不二雄作品(故事背境、各式神奇道具等)、幪面超人 (556)、宇宙戰艦大和號 (Geroro艦長)、機動戰士 (Dangalu同Ganpula)、三一萬能俠、銀河鐵道九九九、龍珠Ｚ以至近期的火影忍者等。年輕一代的觀眾根本唔會知作者背後的心思，但係好似我呢 種 年紀，同原作者吉崎觀音差唔多年代出世的中坑睇見就會非常感動同懷念！用句INＤ的術語講，呢Ｄ就係叫集體回憶！

講番套卡通的故事內 容，其實同樣係充滿教育意義同深刻的寓意！最明顯的莫過於對好戰的舊日本軍國主義作出最大的諷刺，Keroro小隊(本身從軍服、軍旗 以至軍階都係抄足日本皇軍) 完全無厘頭的侵略被徹底小丑化，所有不軌企圖最後都冇好下場。另外，成套戲的人物故事經常圍繞家庭、親情、友情、愛情的重要，雖然經常胡鬧非常，卻絕對係 笑中有淚、屢屢發人深省的佳作！此外，佢仲有對好多時下社會問題的含蓄描寫，好似單親家庭、同性戀、金錢主義等等，等觀眾自己想像。同本地的春田花花系列 （同樣係我頗欣賞的作品）一樣，試問小朋友又點會明 白同Appreciate呢Ｄ野呢？電影發行商一見係(可愛的)卡通人物就自動定位為兒童節目，所有宣傳重點都放在吸引Ｄ小朋友，叫家長帶佢地去睇，可見 我地 社會上的所謂專業Marketing人士係幾咁Low Calibre。

當然，套戲本身都冇話唔適合小朋友睇既：樣子可愛同性格鮮 明的人物、搞笑的場面、大致健康的題材（連我地最德高望重的影視處都絕對唔會為難的）、同埋相當 唔錯的畫功、配樂等。可惜係，今時今日的小朋友同我地成年人心目中的小朋友已經有相當的距離，佢地而家最鍾意的唔再係我地一廂情願認定的可愛同溫情了。

咁 佢地而家鍾意咩？變型金剛啦、蜘蛛俠啦、其次少少就哈利波特都OK既..... 點解？夠刺激（＝暴力＋血腥）啦！型（＝核突＋惡形惡相）啦！High Tech (for the sake of it) 啦！大製作 （＝金錢至上、洗得錢多就係好野）啦，（部份）配音果個係我偶像（＝唔識聽英文）啦！我剛剛在一個討論區上見到有人話軍曹好難睇，Fine! 各人口味本不同。但再睇清楚佢的理由，原來係話套戲打得唔夠激，只花了15分鐘就打敗了對手；另外除左片頭套短片之外都唔係３Ｄ，好失望！大佬呀，幾時有 人睇軍曹 係為左睇打鬥場面架？軍曹或其他日本動畫又何曾係３Ｄ呢?

我諗我真係老了，同呢個世界的主流思想亦越來越遠。有人會選擇 “自我增值”，盡量去跟著時代轉，等自己可以經常保持夠IN。原則上我唔反對求進步的，但人總有自己的底線，有Ｄ原則性既野係唔可以因為“而家唔興”就去 改變的。正如唔係好多人可以好似謝四哥咁成七十歲人仲走去梳辮仔著See-through的。

面試

好唔容易等到有一個面試的機會。話晒搵工已經有一年有多，平均一個月左右都會有一次面試機會，但多數都係唔知乜原因不了了之，所以今次都冇太大期望。

冇 期望除左因為過去的不如意，多少亦因為今次呢間係唔知乜公司，話係搞Technology Startups，自己做Startup已經有成十幾年，雖然自由度高，但係樣樣野自己做晒，又冇Resources，最慘係完全冇安全感，所以已經怕 怕。加上一聽到Technology或者Telecom，又諗起成行都係Ｄ吹水唔抹咀之人，加上以為自己好醒但其實又蠢又廢的人又多不勝數（反正我唔預呢 個Blog會有人睇，所以唔驚得罪人），就真係好厭。不過我而家已經接近饑不擇食階段，都唔理得咁多啦，見步行步啦，如果人地真係咁識貨，又肯俾錢我洗的 話，我一定會幫你做好呢份工既！:)

不過個地址在所謂中環，其實係半山荷李活道，我最最最討厭的地方！都唔明Ｄ人係唔係貪慕虛榮，死都要 搵個所謂在中環的地址，實際上果度交通極之唔方便，地 鐵站行上去起碼15分鐘，行都算，仲要上山！大佬，30幾度架，收買人命咩！就算你富貴到有錢坐的士出入，都要在中環塞車塞餐飽！係呢度返工，去（真正 的）中環同人開會行過去或坐的士都起碼要15分鐘，我從炮台山坐地鐵過來都快過佢啦！加上呢區ＤOffice一般都係好細好窄又舊果Ｄ丙／丁級寫字樓，呢 樣本來我係完全唔介意的，俾咁多錢要個靚Lobby一Ｄ都唔值，又唔係自己的。但我個Point係如果用得呢個Budget，點解唔去灣仔／北角，甚至鰂 魚涌搵間又新Ｄ又大Ｄ交通仲方便好多的寫樓呢？真係超級白痴！一路行一面標汗一面鬧，未見工已經唔想見，但鬼叫你窮？頂硬上啦！

講番間公 司，係兩個香港出世同長大的鬼佬鬼婆開的，除左自己搞Tech Startups，仲會幫其他公司做Consultant，教／幫人投資資訊行業，亦會做Incubator ，即係自己投資落Ｄ佢地認為有潛質的Startup同提供一Ｄ協助。聽落又唔係太差，因為我自己本身做過Consultant，慣左（亦比較喜歡）成日做 不同Projects，Strategy啦，Business Planning啦，幾有挑戰性亦唔會做死一壇野咁悶。同埋（又唔怕得罪人喇）通常做呢Ｄ工作的同事會比較醒，唔似得成世做Operation果Ｄ人咁唔 識轉彎。所以都OK啦。問題係 (1) 佢地會唔會請我， (2) 佢地俾得起幾多人工－－你米來同我玩"好大Upside, 好多Stock Option"果套，我唔係十八廿二，做IT Startup仲早過Richard Li呀！Stock Option係好，但人工唔可以少得太離譜，唔係分分鐘白做！ (3) 佢間公司有乜野後台，未來發展計劃／目標係點。講真，尤其經過今次搵工的慘痛經歷，我真係唔想有第二次，如果佢地真係肯請我而我又決定做，我就會好俾心機 希望做落去（比人挖角例外 :p)。如果佢地唔係有比較穩陣的資金後台就真係要諗過先......

見完之後初步感覺都ＯＫ既：(1) 佢地約我下週再見面，即係對我仲有意思啦（不過講真，我對自己的Qualifications同Profile都仲係幾有信心的，香港地好似我咁上下 Background的人真係多極有限，只係過去一年多的實際情況令我百思不得其解，只有埋怨廢人當道...）(2) 佢地老板問左我的Expectation（其實ＣＶ已經寫左），佢聽左都冇乜大反應，我諗都ＯＫ掛。老實講，我又唔係獅子開大口，佢地要請CEO級我的叫 價一Ｄ都唔算高啦。(3) 未有機會問，第一次見面只係互相介紹下，佢亦冇問我有乜問題。我諗等下次見面，或者人地真係有多ＤIndication想請我先問啦。

咁又睇下下個禮拜（同另外兩位Directors) 見面點樣啦。經過咁多次，我今趟真係好平常心，順其自然啦！

內幕交易

有關美國的內幕交易新聞，再度成為今日報章的頭條。

金錢真係會令人喪失理智，威力遠勝Ｋ仔或綠胺酮。如果你認為自己做人好有原則、好有定力、絕對唔會做呢種事，我請你認真三思。很可能只係你未試過有幾千萬（美元）放在你面前，而四週又完全冇人，亦冇Camera影住你...

一 個我認識了二十多年的好兄弟，他的性格為人我最清楚不過，向來擔屎唔會偷食，做事船頭驚鬼船尾驚賊... 一齊讀大學時佢認識左今日的老婆，係一個好聰明賢慧的女仔，大家都好戥佢高興；佢畢業後發展一帆風順，事業愛情樣樣得意。不過，佢本身係一個非常自我保護 的人，即使最熟的朋友亦有好多野唔會提、唔會講。大家只係知佢撈得好掂，但就冇人知道佢真正做緊乜，估計佢大概唔多唔少係"夫憑妻貴"，所以唔好意思同我 地交待得太清楚，而我地亦都好識做地唔會問太多...

事發幾日前先收到佢email話老婆生左，諗住過幾個禮拜去探下佢地之際，突然發現 佢地一家人上左頭條，真係嚇左一大跳。雖然我不嬲都知／估佢有唔少路數，亦未必每一瓣都係咁干淨，但點都估唔到佢地今舖會做到咁狼死，去得咁盡。大概佢地 已經被貪念完全支配，連最基本的分析能力都冇埋，否則要做都唔會做到咁明目張膽啦！爆左出來根本完全冇得拗，乜野水都洗唔清！

作為佢地多 年好友，自己的心情真係好難形容。一方面怪責佢咁大件事從來冇同自己提過，就算你唔想"益"我，都可以間接地攞Ｄ意見丫，我點都會提你收歛Ｄ，就唔駛搞出 個咁大的鑊！你咁樣都算當我係老死？？另一方面，一個大好青年、一個大好家庭咁就斷送左。錢冇左仲係小事，但係佢同佢家人、家族、甚至家族同世交之間千絲 萬縷的關係，恐怕就唔係咁容易彌補了。如果佢真係失去左個大後台，加上背負一個狼籍的名聲，佢今後如何在呢個咁現實的商業社會立足呢？

貪、嗔、癡所帶來的禍，又多一個活生生的例証。人呀人！究竟仲要見多幾個例子你地至可以領悟呢個道理呢？

無聊日子

從前的天之驕子，今日變成過街老鼠，世界就係如此荒唐。

剛畢業時，無驚無驗地投身最吃香的行業，年紀輕輕已經與垮國大機構高層打交道，每星期出Trip坐商務客位，住最頂級的酒店，出入Board Rooms，前途一片光明。

工作表現深受加許，兩年後被獵頭公司看中，轉投大企業成為總裁私人助理；不久再被前客戶挖角，一齊搞生意。之後一直朝著自己創業做老板的方向走，到七年前，終於成功創立自己的公司。

自 問一直勤奮實幹，每件事都盡十二分認真和努力。DOTCOM熱潮正盛，人人掛住吹水燒錢，不在乎公司死活，只求快快上市GOOD水走人。自己一直默默耕 耘，穏打穏紥地發展。泡沫爆破了，個個雞飛狗走，我們公司仍然奮力支持六年。咁多年來，在無財力，無人力，無後台，無人脈的形勢下，與許多垮國大企業競 爭，仍能打下唔少漂亮勝仗。雖然我冇發到達，但一個劃時代的優良產品，一串充滿創意的市場策略，同一群滿意的客戶和合作伙伴，總算亦令我十分安慰。

不 過公司最後也敵不過市場大趨勢，去年決定退出（也不知算是黯然還是光榮引退），自己再盤算往後的發展。創業的夢想已經圓了，咁多年來孤身作戰也實在令我身 心俱疲，我已經作好準備放下老板的身份，放棄自由自主，做番個打公仔，換取比較穏定的收入同(hopefully)比較悠閒的生活。

難道 經過十年的創業洗禮，我的才能，工作技巧同經驗，真係連剛畢業的自己還不如嗎？難道與中港台頂尖企業簽下的合作計劃是白拿的嗎？找工作已經超過一年了，大 多數的僱主連見面／回覆也不屑，有機會見面的幾家企業，都因為種種原因不了了之...究竟是我自己出了問題，還是全世界出了問題？

實在很 討厭當今企業的人事部，同埋佢地手下一班狗奴才（所謂人事顧問）。佢地對企業營運一無所知，只懂官僚地，盲目地招聘。請人不是唯材是用嗎？為何會拘泥我沒 有某個行業的工作經驗？為何會在乎我沒有為他們的競爭對手打過工？曾經做過一個人事顧問的測驗，成績是他入行以來見過最好的（比平均分數高近一倍），為何 最後連面試的機會也沒有？

我的確很灰心，對自己，對世界，對人... 但灰心歸灰心，日子還是要過的，一天一天的等，一次一次的盼望與失望... 上個月，在一個月之內兩次被雀屎擊中頭部。我本來已不大上街，上街也只是在石屎森林中穿梭，難道香港真的有這麼多雀鳥嗎？我問：我還可以更黑仔嗎？答案是 肯定的。所以我不敢抱怨，最少，我還有一個溫暖的家，世上最好的父母，同最愛我的老婆。如果我事業和生活上的種種不幸全純粹是為了換取家人的健康同快樂， 我絕對無怨無悔。

這是豁達，還是阿Ｑ？我不知道。我只知好多事係自己改變不了，唯有隨遇而安，珍惜現有的一切－－包括這些無聊得令人發瘋的日子。