新加坡之行

昨天剛從新加坡回來。有間英國公司準備在香港同新加坡開地區總部，老細飛左過來見人，但又抽唔到時間來香港，所以請左我過去面試，我亦趁呢個機會順道見一見我個舊老細，睇下會唔會有乜路數介紹過我。

搵左工已經一年有多，今次呢個機會算係比較合適的，因為我總算在這個行頭打滾了十年，而這份工作所需要的經驗和能力我總算是有的。雖然我一直都希望趁今次機會轉行，因為對這行業已經十分厭倦，但這對我這樣年紀的人實在係非常困難，恐怕我只好向現實低頭，叠埋心水在這個既艱辛又醜惡的行業HEAH埋我的餘生啦! 不過正由於呢份工的確係我搵工以來機會最大 (因條件最吻合) 的一次，加上要山長水遠去到外地面試，心情難免緊張，主要係如果今次不成功，就唔知又要等幾耐至有另一個機會。

以前後生時見完工，無論係好定唔好得定唔得，我都會有好準確的感覺。但呢種感覺而家已經冇晒，唔得當然會知，但好多時對方就算好似好Positive都好，最後都唔知點解不了了之。唔知係因為而家D人虛偽左，定係因為我唔再係見Entry Level，變數亦大左的關係。總而言之，感覺就OK既，但只可以返屋企等有冇下聞啦!

至於我那位舊老細，同另一位舊老細十幾年前在馬來西亞開左間投資公司，近年發展好好，在香港、新加坡、泰國、澳洲等地都開了Office。我其實一直都好有興趣入佢地果行，但因為我沒有銀行界經驗，又沒有人脈關係，好多公司都請我食閉門羹。幾個月前趁另一位舊老細過境香港見左面，佢似乎對我仲有少少意思，但因這行頭裡面分工比較專門，只好靜待合適機會的出現，要急都急唔來。今次來到新加坡，而這位舊老細亦剛剛出差到此地，就正好聚一聚十多年冇見之情啦! 佢話有幾單野可能會適合我，佢會返去同其他Partners針針... 不過真係有料到固然可喜，即使將來傾唔成都冇乜所謂既! 我呢兩位舊老細係我第一任僱主，係佢地俾左好多機會我同教識左我好多野，而佢地個人亦好Nice好冇架子。所以就算我真係無緣再同佢兩位做野都好，隔左咁多年見番佢地對我仲係咁好，我都已經好開心啦!

回到香港收到HKU SPACE的通知，早前日語入門班的考試得到個Distinction。呵呵，原來我的老人癡呆症仲未算係好嚴重! 好，一陣馬上去報讀下一級課程啦!

如果我個女做左十四歲媽媽...

一連好幾日煲了幾套日劇，好似變成左一個師奶仔。不過港產劇集實在太悶太無聊太犯駁Ｄ主角又多數好難頂，我又唔鍾意美國佬拍既野，相比之下日劇的確係質素較有保証的。

其中一套十四歲媽媽近期在明珠台都有播，加上所謂＂敏感＂的題材，算係比較IN（雖然好似在日本舊年已播完）的話題作。其實明明係一套相當不錯的劇集，但總係有唔少人鍾意說三道四，話佢＂教壞細路＂。我諗，如果我地每個家長／成人都好似果班＂衞道之士＂咁不由分說就下結論，就唔慌唔係＂社會之福＂了。

劇集始終係劇集，唔合理／太巧合／過煽情的情節係在所難免的，但總括來說此片算係拍得幾出色的。編劇功力固然深厚，演員的表現亦頗為稱職。唯一缺點只係略嫌多煽情DUM波鐘回憶位，今我略感不奈煩。

好多人一聽到十四歲女仔大左肚，都會覺得有冇搞錯，跟住自自然然只會想到一個合理的Next Step, 就係落左佢（或者會加埋報警告經手人衰十一）。我老婆就係其中之一，佢見我睇呢套戲時都係俾左呢個反應我，跟住問我如果第時我有個女係咁我會唔會爆血管加打死佢。我當時根本未開始睇套戲，但我一個自然反應係無論發生左乜野事，都要先了解來龍去脈，聽下當事人的解釋同想法先可以下定論。當然，佢會覺得我只係＂針唔拮到肉唔知痛＂，至會扮到咁冷靜同＂懶＂理性啦。

睇完成套劇之後，我覺得很舒服。雖然對好多人來講都唔可能算係一個圓滿的結局，但係我覺得劇中人都非常幸福。一個突如其來的消息，改變了所有人的命運，無疑各人的路都變得難行了許多，若果佢地可以選擇的話都會寧願事情從來沒有發生過。但正正是因為生命中這些不可預見的不幸和考驗，才能激發出人性最美麗（或最醜惡）的一面。套劇雖沒有交待一瀨未希（那位十四歲妹妹）和她家人以後的生活，觀眾可以想像那將會是充滿著貧窮、壓力和被歧視。但看見那小妹妹對生命、對愛情的執著（實在成熟得有點誇張，若果真有其人恐怕大部份成年人都會覺得無地自容），父母、家人、醫生、老師、同學、記者都被她一一打動了，我也沒有理由懷疑她不可以堅持下去，最終覓到幸福。幸福，其實不在乎你有沒有錢，或者人地係唔係認同你，只要自己無悔就可以了。九歲神童入大學，他將來很可能會後悔／埋怨失去了美麗的童年；少年股神未入大學賺過百萬，當他將來發現錢原來唔係次次都咁易賺時好可能會非常沮喪。如果真的要三選其一，我這個瘋子寧可自己的女兒擁有這位十四歲媽媽般堅毅、不屈，即使她的選擇可能要受盡全世界的非議和排擠。

我地呢個社會，大部份人成日都只會想著點樣搵多Ｄ錢、點樣可以潮Ｄ型Ｄ威Ｄ、乜野最好玩乜野最好食。在無止境的物質追求和功利主義主導之下，Back to Basics的生命、家庭、工作／學業、甚至最最最原始的滿足同快樂，就顯得非常老土。因為呢一切好似都係理所當然的，我地只會覺得它們不夠好：點解我唔生得靚仔Ｄ？點解我阿媽唔可以煩我少Ｄ？點解我個仔成日掛住打機唔讀書？點解我做咁多野人工又咁少，我老細咁廢又搵咁多錢？...

我係一個毀滅主義者，因為我相信這個社會幾乎已到達一個無可救藥的地步。除非發生一個非常大的災難，否則係唔可能單憑少數人的努力去喚醒社會的良知、重燃人類的鬥心。所以我渴望全球大蕭條、大股災（戰爭、恐怖襲擊等造成生靈塗炭的災難，雖然或許會更有效，但我就絕對唔希望會發生了）。看看戰後的德國、日本，就會明白甚麼是知恥近乎勇！即使是在我們小小的香港，SARS疫症爆發期間，大家的團結、奮發和使命感都一下子湧出來了，但當經濟漸漸復甦，大家又高高興興的回到金魚缸、新樓盤大炒特炒，恍惚甚麼也沒有發生過。我們的＂文明＂，係唔係真係膚淺到咁呢？

當然，我呢種諗法係幾乎所有人都會否定的。

阿仙奴，你是我的驕傲！

每年臨近暑假，我都會比較失落，皆因歐洲球季抖暑，在差不多三個月內都看不到我最愛的球隊演出。

喜歡阿仙奴，非因任何球星，而係在於這倫敦球會的悠久歷史、優良傳統，加上細細個睇波時的情意結－－其實我都唔太肯定點解當年會在云云英格蘭球會中看中這支兵工廠，是因為它有一個比較特別的外號？還是因為林柏拉廸、史塔保頓、柏真寧斯等名宿的出色表現呢？但肯定的是，喜歡佢地唔係因為佢地勁，事實上阿仙奴當年並不如今天強大，頂多只能算是中上游球會，如果要說到強隊就有排都未輪到佢地。我諗，呢Ｄ都算係一種緣份啦！直至九十年代中期雲格成為主帥之後，球隊先至冒起成為英國甚至歐洲龍頭班霸之一，可見我當初係幾咁有眼光！:p

好多人一提起阿仙奴，就會想起亨利。亨利無疑係阿仙奴近十年來最出色的球員之一，他在為球隊効力八年，未到三十歲就成為球會130年來的最佳射手，的確可謂阿仙奴的一個傳奇人物。但對我來說，球員只是球隊中的一個部份，傳媒和觀眾傾向將球隊的成敗焦點放在某些球員身上，尤其是作為前鋒球員或射手，往住會忽略了球隊中其他如後防或中場策動功勢的球員，甚至在幕後調兵遣將的領隊和教練。

亨利今個夏天離開了阿仙奴，轉投巨星如云的巴塞；而當英超烈強如利物浦、曼聯，甚至二三流的熱刺、曼城、韋斯咸、樸刺矛夫、阿士東維拉等球會都花鉅資（講緊好幾千萬英鎊）收購球員，阿仙奴則一如既往，雖然出售亨利、龍格堡等球星而進賬不少，但只花了少少錢購入了一些不太有名的球員作替補，因而被一眾球評家，甚至擁躉一致看淡，好多人仲評激會方孤寒、莫財、無大志，甚至頻臨崩潰和被收購...

呢一切只能怪現今的足球已經成為一種娛樂事業，球員被視為明星，一個頂級球星的身價可以達數億港元，人工每星期過百萬。大家只會看那一隊波多名星，就認為那就一定是最出色的球隊。然而事實上這種情況在歷史上郤幾乎從來沒有發生過！當年擁有六條煙的皇馬不是四大皆空嗎？上屆巴塞擁有郎拿甸奴、伊度奧、美斯、沙維等猛將，不也是全軍盡墨嗎？

近年阿仙奴的成功，功勞最大的肯定是教頭雲格，他眼光極之獨到，往往能點石成金，購入籍籍無名的小將，加以悉心調教而成為世界級球星。今天指責阿仙奴放棄亨利而選擇籍籍無名的Eduardo（港譯達施華），就係八年前指責球會放棄安歷卡而購入（當年）籍籍無名的亨利的同一班人。除了亨利之外，在雲加手中由無名小卒而成為大名星的還有安歷卡、韋拉、比提、奧華馬斯、龍格堡或者較近年的法比加斯同雲佩斯。呢Ｄ球員買回來最多只係數百萬鎊，有些甚至是免費。但當雲加認為他們已經＂差唔多＂，就會將之高價賣出，繼而讓出位置給後浪。咁多年來，雲加在轉會市場鮮有失手，當其他球會每年要投入數千萬鎊收購球員，阿仙奴幾乎是全個歐洲球壇（以甲組計）唯一能長期從轉會市場賺錢的球會，這亦是阿仙奴之所以能夠在雲格執教的十年內，賺取足夠金錢自資興建價值三億六千萬英鎊的阿聯酋球場的主因。而事實亦證明，過去雲格所放棄的大球星，基本上自離開阿仙奴之後都快速走下坡，好多個都無復當年勇，最後黯然退役。

雲格調教下的阿仙奴，最受人讚賞的肯定是其快速、漂亮的進攻組織，同流暢、悅目的整體合作，與傳統英式足球的長傳急攻或南美拉丁足球的著重個人腳法截然不同，別樹一幟。在英國，阿仙奴的足球被稱之為Wengerball，被許多球評家（包括視阿仙奴為死敵的曼聯或熱刺球迷）公認為是當今最漂亮精彩的足球。事實上，阿仙奴憑這種快速同整體性的攻撀性踢法，在沒有大牌球星壓陣的情況下，往往能剋制強敵，震動球壇。

所以，即使沒有亨利，我認為對阿仙奴影響係好有限的。事實上，亨利上兩季表現同影響力已大不如前。我相信，雲格或許未必真係100%想賣走亨利，但肯定並非太想挽留佢。事實上，從上季亨利長期缺陣時同季前友賽的表現來睇，實在睇唔出阿仙奴沒有亨利有任何退步。反之，每人走多一部，放膽表現自我（亨利在陣時基本上是很難的，因這位大佬經常因為隊友不傳球給他、或射門失準而黑面，令好多隊友同佢一齊時都顯得戰戰競競）。目前唯一存在的問題，可能只係球隊本身的人腳可能有Ｄ不足（唔係唔夠球星，而係根本就唔夠人），另外雲格本身的合約來屆到期，佢不但係球會的精神領袖，甚至可以話係阿仙奴的一切，大家都期待佢可以快Ｄ續約...

講左咁多廢話，其實只係想帶出琴晚期待已久的新一季英超賽事，阿仙奴首戰主場迎擊富咸。富咸係今季英超降班熱門份子，理應＂實食冇黐牙＂。誰不知... 列文唔知係唔係買重左對手前鋒＂首名入球＂，竟然... 開波唔夠一分鐘就無端端犯左個連小學生都唔會犯的錯而送左一球俾對手。跟住成場波好似舊年的魔咒翻版：攻勢一浪接一浪但唔係僅僅出界就係射正個龍門或對方防守球員身上，球證應判又唔判十二碼... 正當我睇到好冇心機，行開左抖一抖之際（果時已係臨完場前幾分鐘），至由雲佩斯射入追平。諗住攞番一分都已經算好彩啦，點知全場最後一分鐘完成大逆轉，由希比射入反勝二比一！真係峰廻路轉，心臟弱Ｄ都頂唔住呀！

無可否認，足球場上的勝負係要靠多少運氣的。琴晚我地贏波可以話係一種運氣，但亦可以話係過去一年來（包括琴日入波之前果八十幾分鐘）我地的運氣都係差到極點，攻極都唔入之餘，對手一次進攻我地就失守了。希望今次呢場雖然贏得驚險，都可以比各位小將們打一支強心針啦！事實上佢地係有足夠實力同曼聯、利物浦、車路士甚至一眾歐洲列強爭勝的，問題只係未來九個月裡，佢地是否有足夠耐力去保持水準狀態同穏定性，同埋運氣會否終於肯回來我地一方啦！

懷念皇后，同埋一切昨日的美好回憶

差唔多成個禮拜冇寫Blog了，真係對唔住（同自己講的，因為反正都係自娛性質），一來（最主要的原因）係自己懶，二來係唔知寫乜好，三來係想寫的東西又好似太長，又懶（又係呢個理由）又不知從何入手... Anyway, 我都希望可以Keep到每個星期至少寫一兩篇，感覺轉瞬即逝，我都好想藉一Ｄ粗淺文字試圖將佢記下來，呢個就當係我對自己的承諾吧。

琴日一直收看電視直播皇后碼頭清場的情況。老實講，我唔算對呢個地方好有感覺，雖然接近二十年前我在果度附近（準確Ｄ講應該係舊天星碼頭出卜公碼頭的天橋上，果兩處已先後拆晒了）第一次拖女仔的手。她是我第一位女朋友，我諗我亦係佢第一個男朋友，當時我地仲係中學生，佢係我地學校的校花，本來我地係好好的朋友，但唔知點解佢咁冇眼光偏偏選中我...還好，佢後來的眼光進步左好多好多，今時今日佢已經貴為一位超級大人物＋年青才俊的太太，擁有兩個囡囡的幸福家庭，我都好替佢開心。本來我地應該都仍然算係好朋友，可惜佢一方面忙，一方面係半個公眾人物，而我則一事無成，都冇乜面目搵佢聚下舊...

講番皇后碼頭，其實那個地方真係好簡陋，亦冇建築特色可言。對它有感情，全因那處（包括舊天星碼頭同大會堂）充滿著舊港英時代的回憶。我生於七十年代，可算是見証著香港的經濟起飛，雖然我唔覺得對英國有乜野特別的好感，但一個不爭的事實係：沒有英國人的管治，今日香港好可能只係一個比深圳仲要落後的地方。當然，你可以話一切係客觀歷史環境使然，並不代表英國對香港特別眷顧。無可否認的係，英國帶給我們香港人一個國內同胞沒有的機遇，讓我們在一個相對自由、開放的空間去發揮自己所長，創造了一個經濟（同文化）的奇蹟。

特區政府在咁強烈的反對聲音下堅持要拆毀皇后碼頭，表面理由係要發展（基建同商業），保育人仕大多數亦主要係埋怨港府保存舊有文化同集體回憶不力，只顧向錢看和討好地產商。但實際的原因好簡單，就係因為皇后碼頭係港英殖民地歷史的頭號代言人。你地嘈話唔好再抹去九龍皇帝的墨寶，唔好拆灣仔街市等等，通通有得相量，唯獨係天星碼頭，同更加＂港英餘孽＂的皇后碼頭，就絕對冇轉灣餘地。因為歷代英國皇室人員同港督都係從果處上岸，而末代港督肥彭同查理斯皇子在97年6月30號晚亦係從果處上船離開香港。一個咁殖民地色彩的地方，班擦鞋仔容許回歸左成十年先折，已經可謂仁至義盡了。

我一直耿耿於懷、甚至引以為恥的，係無論中央政府定特區政府，多年來都沒有對英國人說過一聲多謝，反而不斷將百幾二百年前的歷史重複炒作。雖然英國人當年迫清政府割讓香港的歷史係好不義，管治以來亦有好多歧視同唔公義的往績，但我想絕大部份生於60-80年代的香港人，都會認同港英政府的功勞－－自由、開放、公平、法治、廉潔、文明、制度、尊重、包容等等今日被統稱為＂香港核心價值＂的東東，那一樣不是英國管治期間培育而逐漸紥根每個港人心中的？有那一樣係我們（今日）的祖國所有的？這一切，都是讓香港在今時今日、甚至未來（起碼）五十年內都仍然會領先於內地的優越條件！中央政府或內地人民痛恨英國人，視香港回歸為重大勝利的心態我可以理解，但那些所謂飲香港水、流香港血的特區權貴，咁多年來都未有表達過對英國人＂知遇之恩＂的感激，實在令人齒冷！

香港係一個金錢至上的物質社會，全世界除左內地人（同台灣人）恐怕沒有其他國家的人更愛錢了。所以當中國經濟起飛，連帶香港亦受惠於各種祖國的等別眷顧，很多人的良心都被金錢所蒙敝。相對於今時今日的利欲薰心、急功近利、日炒夜炒，我更愛80年代的腳踏實地、不辭勞苦、勤奮實幹！如果六四事件發生在今天，仲邊處搵一百萬人來上街呢？雖然今日的香港人或許係富貴了，但只嘆世風日下、道德淪亡，始終還是昨日的一切最窩心、最令人懷念！