はじめる!

第二年的日本語課程，今天終於開學了!

一樣的時間，一樣的地點，但老師跟同學都不同了。除了其中約十位是去年的舊同學，其他近三十位都是其他班轉過來的。今年的老師也是日本人，但不像去年那位般精通中英文，一開課便假設我們都是上手，全日語頻道，而且說得很快，又不會在黑板寫下生字，真是苦透了我們這群早已將去年所學忘得一乾二淨的老學生! 全班最醒目的，恐怕就是兩位還是中學生的妹妹仔! 冇辦法啦，人地又わかい(年青)又かわいい(可愛)，讀慣書，唔似得我地班老餅個腦早已實晒!

由於要Claim持續進修基金，好幾位同學都同時報讀了來緊十二月的日本語能力試三+四級。略略看過去年的試題，以我地目前的程度來講第四級都有D Mun水，第三級真係唔知點應付。難委去年的老師仲鼓勵我地考第三級，因為第四級太淺考來無謂，佢真係太高估了我地啦!

冇辦法啦，報左就唯有頂硬上，趁自己無聊睇多幾套日劇惡補下啦! (不過其實日劇裡面用的都係日常口語化的"普通形"文法，同我地上堂教的ます形不太一樣，所以至今我睇日劇有95%都唔知佢講乜，所以話睇日劇學日文的人，都係純粹搵個籍口睇劇而矣!) :)

歲月不留人

唔經唔覺有好幾個星期冇UPDATE個BLOG了，在此先向我絕無僅有的讀者們講句對不起。本來以我這樣一個極度無所事事的人，唔應該有任何藉口乜野都唔寫，但係這些日子實在真係太平淡了，看幾集卡通片或日劇，再打幾舖機咁又一天，真係唔知搵D乜野好寫。

然而，無聊的日子仍然係一天一天的過，並沒有因為自己的苦悶而稍稍放慢腳步。唔經唔覺，自己又老多一歲了，以人類的平均壽命來計，我已經"半個人入左棺材"了。生日前後，總有幾位相交廿幾三十年的老死仲會記得自己，對於一潭死水的我來說，已經是最好的禮物了! 雖然大家各有各的家庭、事業，一年最多只會見兩、三次面，平日連電話、Email甚至MSN聯絡都唔多，但每次聚會總係最窩心的。有好多野大家唔駛多講已經心照啦，得如此知己，又夫復何求呢?

可是，享受與老友見面之餘，亦同時提醒自己好幾個月的光陰又白白溜走了。回想過去近兩年以來，真係唔知自己做過D乜，可以一提的事情乏善足陳。可以蹉跎的歲月，我已所剩無多。如果現實世界真係有叮噹，我會不惜一切求佢借我"時間錢箱"，好讓我將呢D咁無聊的日子儲存起來，假如將來真係有"否極泰來"的一天，就可以好好利用了。

其實我真係唔想咁頹廢的，自問心裡面果團火，而家正燒得比我以前任何一段日子更加熾熱。我只係哀祈俾我遇到一個重生的機會，讓我可以一鼓作氣，以自己的實力、努力同毅力再搏殺，但奈何就連一個小小的機會都係無辦法搵到。我亦嘗試過降低要求，但現實唔係話你肯就可以的。除左等，我真係唔知仲有D乜野我可以做...

前幾日一代男高音Pavarotti與世長辭了，回想起在大學時代我曾經在一次表演中獻醜扮他唱歌，想不到十多年後他在我生日的一天離開人世。那段日子同埋他的歌聲都係令我非常懷念的。