稀客

日日無所事是，都係上下網睇下呢睇下路，上下討論區、又或者去人地的Blog度做下CD-ROM。都有諗過自己寫Ｄ野渡下日神，但係一來又懶，二來又唔知寫乜好，三來係唔知寫來做乜，所以一直都係得個睇字。米以為我係果Ｄ好Out的網盲接受唔到網上社交呀，實情我係箇中老手兼高手，十年有多之前當年青人仲係沉迷機舖同玩Line之時，我已經上ICQ溝女無數啦，仲俾我認識左今日的老婆大人添！邊個敢話網上無真愛呀？

可能因為以前做得呢Ｄ野多，而家已經冇乜衝勁在網上結交新朋友。一來係唔似得以前咁饑渴，二來係人老左就變得自閉。後生時一有心事就想搵地方抒發：搵人傾計啦、聽或唱下Ｄ歌詞好似差唔多Feel的歌啦、借下酒（或其他野）消愁啦！而家覺得呢一切都實在係好無聊：自己的問題與人無關，即使人地肯聽亦只有愛莫能助；自我發泄消愁呢家野就更加幼稚，問題解決唔到之餘仲只會帶來更多煩惱（例如飲醉之後所有可能發生的後果）。我同好多差唔多年紀的男性朋友傾開，大家都好有同感，因此大家就漸漸變得沉默、內籨、含蓄，老友見面亦變成心靈交流多於高談闊論。當然，女性的思想構造係好唔同的，我亦有幸有好幾位多年紅顏知己（即係人地的靚老婆／靚媽咪），不過男人之苦，既不想亦不容易同佢地啟齒，講左亦都多數唔會聽得明（唔係話佢地蠢，只係女性好多時唔明男人的價值觀，男人亦好難了解女性果套思考邏輯）。老朋友如是，新朋友就更加提不起勁去搵啦！結論係，所有心事都係藏於心底，讓它歷久常新罷了。

上個禮拜無啦啦手痕，竟然開左呢個Blog，仲不經不覺已經寫左一個星期。的確，心裡面的說話寫左出黎係好似暢快左Ｄ既，雖然我唔排除呢種感覺只係因為花左成個鐘係度打字之後的麻木效應。不過由開始到而家，我都只係諗住當寫下日記同Kill下Time咁啦，想發牢騷就發、想鬧下人就鬧、踩下人就踩，完全唔駛負責任果隻。所以連我老婆都唔知我開左呢個竇架！

今日又係在網上閒逛，偶然睇到兩位朋友的Blog想回應下，估唔到佢兩位都真係會過來我呢邊睇下我係乜水喎。寫左Ｄ野有人俾面肯睇始終係令人感動的，我衷心多謝佢地，亦希望佢地有空仍會過來探下我呢個無聊人啦！